Heb 4 | MED | STEP | Ei kᵾn, Got ndi, nimba mᵾi ropa kᵾn, tᵾn elim nga wamp muⱡ tᵾtmin kona ila, tᵾn mep rukᵾr mbi nitim. Ei nga, tᵾn mundmong indimin. I iti nᵾtmᵾn ndam, wamp ti, Got nga wamp muⱡ ti kona ila rukᵾr pi napᵾmba.

Hebrews 4

Got Nga Wamp Muⱡ Ti Kona

1 Ei kᵾn, Got ndi, nimba mᵾi ropa kᵾn, tᵾn elim nga wamp muⱡ tᵾtmin kona ila, tᵾn mep rukᵾr mbi nitim. Ei nga, tᵾn mundmong indimin. I iti nᵾtmᵾn ndam, wamp ti, Got nga wamp muⱡ ti kona ila rukᵾr pi napᵾmba. 2 Tᵾn akup Got nga Rᵾnang Ik Kai ei pᵾnmᵾn. Uⱡ ei mel ku, Isrel wamp mbᵾ, unt Got nga Rᵾnang Ik Kai ei pᵾtᵾng. Ik Kai kᵾⱡ, wei mint pilik kᵾn, Got kᵾn mondᵾk pili napᵾtᵾng mon. Nambuⱡ emel, Got nga ik kai pᵾtᵾng kᵾⱡ ndi, wamp mbᵾ tᵾpa rᵾpndi nᵾpᵾndrᵾm. 3 Tᵾn mondpᵾn pᵾtmᵾn wamp mbᵾ, Got nga wamp muⱡ ti kona ila rukᵾr mbin. Got ndi, nimba mel unt popᵾⱡ kuⱡpa kᵾn,

“Na ik kupa ti mendpᵾⱡ nᵾnt. Wamp mbᵾ ya, na nga muⱡ ti kona ila, rukᵾr ui nᵾwing mon!” nᵾtᵾm.

Unt Got ndi, muⱡ mᵾi raⱡ etpa pora ndupa kᵾn, wote kongun ei nga ti, aldpa iti nᵾtimp nimba kᵾn, ik kᵾⱡ nitim. 4 Buk Wingti ila ik mong ti ndi, nimba mel,

“Got ndi rumbᵾⱡ 6 kᵾⱡ ila, kongun etpa mba kᵾn, rumbᵾⱡ 7 ila muⱡ tᵾpa kor murum,” nᵾtᵾm.
5 Buk Wingti ila, ik kᵾⱡ nga aldpa, nimba mel,

“Na nga wamp muⱡ ti kona ila wamp mbᵾ, kapⱡa rukᵾr ui nᵾwing mon!” nᵾtᵾm.
6 Wamp mat, unt kuimp tek, Got nga nimba mᵾi rurum ik kai kᵾⱡ pilik kᵾn, Got nga wamp muⱡ ti kona ila rukᵾr pi napᵾrᵾng. Nambuⱡ emel, Got ei, mondᵾk pili napᵾtᵾng. Wote wamp mat, Got nga wamp muⱡ ti kona ila rukᵾr purmin. 7 Ei kᵾn, Got ndi, ui elpa ti, etpa pendpa, rukᵾr uing nitim ui ei, ‘Akup.’ Wote, pana mat ou ndupa omba puⱡnga kᵾn, Got ndi, Depit nga keta ila nimba ekit nduⱡnga, Buk Wingti ila mon rok, nᵾk mel,

“Enim ndi, Got nga ik ei, akup pilᵾng ndam, enim ndi, tᵾk roi ndui nᵾndᵾi mon!” nᵾtᵾm.
8 Unt wu Josuwa ndi, wamp mbᵾ rᵾp etpa mepa mba, Got nga wamp muⱡ ting kona kupa mendpᵾⱡ ila, tᵾpa monduⱡnga ndam, Got ndi, ui ti petᵾm nitim ik ei, ni nandilinga. 9 Ei nga, Got ndi, elim kongun etpa mba rumbᵾⱡ 7 ila muⱡ tᵾpa, kor murum. Ei mel ku, Got nga wamp mbᵾ, muⱡ tᵾk kor muⱡing ui ei petᵾm. 10 Ei kᵾn, Got elim kongun etpa, muⱡ titim ei mel, wamp nam ti, Got kᵾn mba muⱡ tᵾm ei, el elim nga kongun etᵾm uⱡ ila muⱡ tᵾmba. 11 Ei kᵾn, tᵾn akup kongun ronduⱡ mundpᵾn etpᵾn, Got nga wamp muⱡ ti kona ila rukᵾr mbun muⱡmin. Nambuⱡ emel, unt Isrel wamp mbᵾ ndi, Got nga ik ei, tᵾk roi nduk, elim nga wamp muⱡ ti kona ila, rukᵾr pi napᵾrᵾng. Uⱡ ei mel, tᵾn iti nᵾtᵾmin.

12 Ei nga, Got nga ik ei rᵾk rᵾk kont mba tetᵾm ei ndi, kongun ronduⱡ mundpa etpa mint morum. Ik ei, koiya ti mbuldung orung raⱡ nengᵾn nga norum ei, tᵾp mana ndupa, ama minal nengᵾn norum. Ei ndi, wamp mbᵾ nga min muⱡnga pepa mba, kᵾng ombᵾl randrᵾm tᵾkᵾm ila, kun koptᵾpa rukᵾr mba, wamp mbᵾ nga numan orunga kᵾn, numan pilik uⱡ etmin mbᵾ, kᵾmp tᵾpa kandrum. 13 Wote, Got nga mim itim mel mbᵾ pora, elim nga kuimp keta ila ekit omba tetᵾm. Ei nga, tᵾn wamp mbᵾ pora, tᵾn nga uⱡ etmin mbᵾ, Got elim kᵾn kun nimp nguimin. Wote Got ndi, weng ndupa itim mel mbᵾ nga ti, elim nga kuimp keta ila mo rui narᵾmba.

Wu Pris Kuimbal Ei Jisas Morum

14 Ei nga wote, tᵾn nga Wu Ou Pris Kuimbal ei, wi muⱡ kona ila Got nga kuimp keta ila rukᵾr purum. Wu ei, Got Kangᵾm Jisas. Ei nga, tᵾn nga mondpa pili ila, ik nimbun uⱡ etmin mbᵾ, ambuⱡpᵾn gi ndamᵾn. 15 Tun nga Wu Pris Kuimbal ei ndi, oⱡa tᵾpa kᵾni uⱡ kit mat, elim kᵾn urum mbᵾ, tᵾpa mana ndupa uⱡ ⱡawa ti, iti nᵾtᵾtᵾm. Ei nga, oⱡa tᵾpa kᵾni uⱡ kit mat, tᵾn kᵾn orum mbᵾ, elim ndi, pilpa pora ndupa morum ei ndi, tᵾn tᵾpa rapᵾndᵾmba mint. 16 Ei nga, tᵾn mbun mat pem ei kᵾn, tᵾn ronduⱡ mbun, Got nga wamp poⱡ ti uⱡ morum kona ila, atinga ropᵾn ruk mbun, elim nga wamp poⱡ ti uⱡ ei kᵾn, wamp kont uⱡ mbᵾ ndi, tᵾn tᵾpa rapᵾndᵾmba.